బ్రెజిల్లో బలమైన గాలులకు నేలకూలిన స్టాట్యూ ఆఫ్ లిబర్టీ నమూనా
బ్రెజిల్లో కుప్పకూలిన 24 మీటర్ల స్టాట్యూ ఆఫ్ లిబర్టీ ప్రతిమ
భారీ ఈదురు గాలుల కారణంగా నేలకొరిగిన విగ్రహం
ప్రమాదంలో ఎవరికీ గాయాలు కాలేదని వెల్లడి
సోషల్ మీడియాలో వైరల్ అయిన ఘటన వీడియో
బ్రెజిల్లో భారీ ఈదురు గాలుల కారణంగా ఓ షాపింగ్ స్టోర్ వెలుపల ఏర్పాటు చేసిన స్టాట్యూ ఆఫ్ లిబర్టీ నమూనా విగ్రహం కుప్పకూలింది. గ్వాబా నగరంలో నిన్న ఈ ఘటన చోటుచేసుకుంది. అదృష్టవశాత్తు ఈ ప్రమాదంలో ఎవరికీ ఎలాంటి గాయాలు కాలేదు. ఈ ఘటనకు సంబంధించిన వీడియో సోషల్ మీడియాలో వైరల్ అయింది.
పోర్టో అలెగ్రే మెట్రోపాలిటన్ ప్రాంతంలోని ‘హవన్’ రిటైల్ స్టోర్ కార్ పార్కింగ్ ఏరియాలో ఈ 24 మీటర్ల ఎత్తైన విగ్రహాన్ని ఏర్పాటు చేశారు. సోమవారం ఆ ప్రాంతంలో గంటకు 90 కిలోమీటర్లకు పైగా వేగంతో బలమైన గాలులు వీచాయి. ఈ గాలుల ధాటికి తట్టుకోలేక విగ్రహం నెమ్మదిగా పక్కకు ఒరిగి, పార్కింగ్లో ఉన్న వాహనాల సమీపంలో కూలిపోయింది.
వాతావరణ శాఖ ముందుగానే ఈ ప్రాంతంలో తుపాను హెచ్చరికలు జారీ చేసింది. శీతల గాలుల ప్రభావంతో ఈ పరిస్థితి ఏర్పడిందని, ఇవాళ్టి నుంచి వాతావరణం మెరుగుపడే అవకాశం ఉందని అధికారులు తెలిపారు.
